విశాఖ ఎడ్యుకేషన్, ఫిబ్రవరి 3ఫ్లాష్ మెయిల్ న్యూస్ పబ్లికేషన్స్ : ప్రముఖ జైన పండితుడు, మేనేజ్మెంట్ నిపుణుడు ఎడ్యువర్సిటీ ఎడ్యుకేషన్ స్థాపకుడు డా. ముని ఆదర్శ్ ఆచార్యజీ ఈరోజు ఇక్కడ ఇంటిగ్రల్ ఇన్స్టిట్యూట్ ఆఫ్ అడ్వాన్స్డ్ మేనేజ్మెంట్ ఐ ఐ ఏం ఏం లో “మైండ్ మేనేజ్మెంట్ మరియు సచేతన జీవనం అనే అంశంపై ప్రత్యేక ఉపన్యాసం ఇచ్చారు. ఈ కార్యక్రమంలో అధ్యాపకులు, విద్యార్థులు వున్నారు. తన ప్రసంగంలో డా. ముని ఆదర్శ్ ఆచార్యజీ అంతర్గత నియంత్రణ, ఆత్మజ్ఞానం, నైతిక జీవనం సమర్థవంతమైన నాయకత్వానికి సమగ్ర విజయానికి పునాదులని వివరించారు. జైన తత్వసూత్రాల ఆధారంగా, మైండ్ మేనేజ్మెంట్ మరియు సచేతన జీవనం ద్వారా ఒత్తిడిని అధిగమించడం, ఆలోచనల్లో స్పష్టతను పెంపొందించుకోవడం, క్లిష్టమైన ఆధునిక జీవితంలో లక్ష్యబద్ధమైన జీవనాన్ని నిర్మించుకోవడం ఎలా సాధ్యమో విశదీకరించారు. ఈ కార్యక్రమంలో ఐ ఐ ఏం ఏం చైర్మన్ డా. ఎస్. పి. రవీంద్ర, డైరెక్టర్ జనరల్ ప్రొఫెసర్ వి. కృష్ణమోహన్, వైస్ చైర్మన్ డా. విజయ రవీంద్ర, ఈక్యూ ఫర్ పీస్ వైస్-ప్రెసిడెంట్ డా. చల్లా కృష్ణవీర్ అభిషేక్, మరియు డాక్టర్ సరాబంది మాట్లాడారు. ఆధునిక విద్యా–మేనేజ్మెంట్లో ఆధ్యాత్మిక విలువలను సమన్వయం చేయడంలో డా. ముని ఆదర్శ్ ఆచార్యజీ చేసిన సేవలను వారు ప్రశంసించారు. యువత, వృత్తిపరుల మధ్య ఇలాంటి దృక్కోణాలు ఎంతో అవసరమని వారు అభిప్రాయపడ్డారు. ఈ సందర్భంగా డా. ముని ఆదర్శ్ ఆచార్యజీకి ఆధ్యాత్మిక మేనేజ్మెంట్, విద్య, సచేతన నాయకత్వ రంగాల్లో ఆయన చేసిన విశిష్ట సేవలకు గాను “స్పిరిచువల్ సైంటిస్ట్ అవార్డు” ప్రదానం చేశారు. ప్రాచీన జైన జ్ఞానాన్ని ఆధునిక సమాజానికి అన్వయించేలా ప్రాయోగిక రూపంలో అందిస్తున్నందుకు ఈ పురస్కారం ఆయనకు అందజేయబడింది.
ఈ కార్యక్రమంలో సి. శ్రుతి సారణి, డా. కృష్ణవీర్ అభిషేక్ రచించిన “జినేంద్ర రామాయణం” గ్రంథాన్ని డా. ముని ఆదర్శ్ ఆచార్యజీ ఆవిష్కరించారు. ఈ గ్రంథం రామాయణాన్ని జైన దృక్కోణంలో విశ్లేషిస్తూ, అహింస, కరుణ, ఆత్మనిగ్రహం, అంతర్గత జాగృతి వంటి విలువలను సాహిత్యాత్మకంగా ప్రతిపాదిస్తుంది. ఆధునిక సమాజంలో నైతిక–ఆధ్యాత్మిక విలువలను ప్రోత్సహించడమే ఈ రచన లక్ష్యమని రచయితలు తెలిపారు.