ఉపముఖ్యమంత్రిని ఆహ్వానించిన ఏయూ అధికారులు

విశాఖ ఎడ్యుకేషన్,ఏప్రియల్ 6 ఫ్లాష్ మెయిల్ న్యూస్ పబ్లికేషన్స్ : ఆంధ్రవిశ్వవిద్యాలయం గౌరవ వైస్ ఛాన్సలర్ ప్రొఫెసర్ జి.పి. రాజశేఖర్ తరపున, విశ్వవిద్యాలయ అధికారుల బృందం ఆంధ్రప్రదేశ్ గౌరవ ఉప ముఖ్యమంత్రి పవన్ కళ్యాణ్ ని కలిసి ఏప్రిల్ 8న జరగనున్న “ఏయూ మెగా కల్చరల్ ఫెస్ట్ 2026 కార్యక్రమానికి ముఖ్య అతిథిగా విచ్చేయవలసిందిగా కోరుతూ వారు వ్యక్తిగతంగా ఆహ్వాన పత్రికను అందజేశారు. ఈ సమావేశంలో భాగంగా, ఆంధ్ర విశ్వవిద్యాలయ శతాబ్ది ఉత్సవాల సందర్భంగా నిర్వహిస్తున్న యువజన కార్యక్రమాల (యూత్ ఈవెంట్స్ ) పోస్టర్ ఆవిష్కరణ గురించి కూడా బృందం గౌరవ ఉప ముఖ్యమంత్రికి వివరించింది. విశ్వవిద్యాలయ ఘనమైన వారసత్వంలో ఈ వేడుక ఒక ముఖ్యమైన మైలురాయి అని, సాంస్కృతిక మరియు విద్యాపరమైన కార్యక్రమాల ద్వారా యువతను క్రియాశీలంగా భాగస్వామ్యం చేయడమే దీని లక్ష్యమని వారు పేర్కొన్నారు. ఏయూ రెక్టార్ ఆచార్య పులిపాటి కింగ్, ఫెస్ట్ చైర్మన్ ఆచార్య ఎన్. విజయ మోహన్, దుర్గాబాయి దేశముఖ్ మహిళా అధ్యయన కేంద్రం సంచాలకులు ఆచార్య పల్లవి ఏయూ క్యాంపస్లో జరగనున్న ఈ శతాబ్ది యువజన వేడుకల్లో పాల్గొనవలసిందిగా గౌరవ ఉప ముఖ్యమంత్రిని వారు సాదరంగా ఆహ్వానించారు. ఈ కార్యక్రమంలో ఆంధ్రప్రదేశ్ రాష్ట్ర సైన్స్ అండ్ టెక్నాలజీ కౌన్సిల్ ఏ పి సి ఒ ఎస్ టీ పర్యావరణ, అటవీ, సైన్స్ & టెక్నాలజీ విభాగం, మెంబర్ సెక్రటరీ, సీఈఓ డాక్టర్ కె. శరత్ కుమార్ పాల్గొన్నారు. శతాబ్ది ఉత్సవాల్లో భాగంగా ఆంధ్ర విశ్వవిద్యాలయం భారీ స్థాయిలో యువజన కార్యక్రమాలను నిర్వహించడాన్ని ఉప ముఖ్యమంత్రి అభినందించారు. వారి ఆహ్వానానికి సానుకూలంగా స్పందించారు.